ຕອນເຊົ້າຂອງວັນທີ 25 ທັນວາ 2020, ທ່ານ. ສຈ. ຫວງຊິ້ງ ຮອງອາທິການບໍດີມະຫາວິທະຍາໄລ ຊູໂຈ ລາວ ໄດ້ເຂົ້າພົບ ທ່ານ.ຮສ.ປອ ພຸດ ສິມມາລາວົງ ເລຂາຄະນະພັກ, ຮອງລັດຖະມົນຕີ ກະຊວງສຶກສາທິການ ແລະ ກິລາ.

   ໃນເບື້ອງຕົ້ນ, ທ່ານ. ສຈ. ຫວງຊິ້ງ ໄດ້ສະແດງຄວາມຂອບໃຈມາຍັງ ທ່ານ.ຮສ.ປອ ພຸດ ສິມມາລາວົງ ທີ່ໄດ້ສະລະເວລາໃຫ້ການຕ້ອນຮັບໃນຄັ້ງນີ້, ພ້ອມທັງໄດ້ຕາງໜ້າໃຫ້ແກ່ມະຫາວິທະຍາໄລຊູໂຈ ລາວ ຖືໂອກາດອວຍພອນປີໃໝ່ລ່ວງໜ້າ, ຂໍອວຍພອນໃຫ້ທ່ານຈົ່ງໂຊກດີປີໃໝ່. ຫຼັງຈາກນັ້ນ,ທ່ານ.ສຈ. ຫວງຊິ້ງກໍໄດ້ລາຍງານກ່ຽວກັບສະພາບການຈັດຕັ້ງການຮຽນ-ການສອນ ຂອງມະຫາວິທະຍາໄລ ຊູໂຈ ລາວ ແລະຂໍສະແດງຄວາມຂອບໃຈເປັນຢ່າງສູງ ມາຍັງທ່ານຮອງລັດຖະມົນຕີ ທີ່ໄດ້ມີຄວາມເປັນຫ່ວງເປັນໄຍແລະ ໃຫ້ການສະໜັບສະໜູນວຽກງານຂອງມະຫາວິທະຍາໄລ ຊູໂຈ ລາວ ໂດຍຕະຫຼອດມາ.

   ທ່ານ.ຮສ.ປອ ພຸດ ສິມມາລາວົງ ໄດ້ສະແດງຄວາມຂອບໃຈມາຍັງ ທ່ານ.ຫວງຊິ້ງ ກໍຄືມະຫາວິທະຍາໄລ ຊູໂຈ ລາວ ທີ່ໄດ້ເຂົ້າມາອວຍພອນປີໃໝ່ໃນຄັ້ງນີ້, ພ້ອມທັງຝາກຂອບໃຈໄປຍັງມະຫາວິທະຍາໄລຊູໂຈ ຈີນ ກໍຄືມະຫາວິທະຍາໄລ ຊູໂຈ ລາວທີ່ໄດ້ປະກອບສ່ວນເຂົ້າໃນການຊ່ວຍສ້າງບຸກຄະລາກອນໃຫ້ແກ່ ສປປ ລາວ. ທ່ານຍັງໄດ້ເວົ້າວ່າ,ເນື່ອງຈາກສະພາບການພັດທະນາເສດຖະກິດຂອງ ສປປ ລາວ ຍັງຂ້ອນຂ້າງລ້າຫຼັງ, ປະຊາຊົນສ່ວນຫຼາຍຍັງບໍ່ທັນໃຫ້ຄວາມສໍາຄັນ ຕໍ່ການສຶກສາເທົ່າທີ່ຄວນ, ໃນໄລຍະໝໍ່ໆມານີ້,ຄວາມສົນໃຈໃນການເຂົ້າຮຽນຕໍ່ໃນລະດັບມະຫາວິທະຍາໄລຂອງຊາວໜຸ່ມລາວ ແມ່ນມີທ່າອ່ຽງຫຼຸດລົງ,ໂດຍສະເພາະແມ່ນໃນປີນີ້ ພາຍຫຼັງທີ່ມີສະພາບການແຜ່ລະບາດຂອງເຊື້ອພະຍາດ COVID-19, ມະຫາວິທະຍາໄລພາກລັດຫຼາຍໆແຫ່ງ ກໍປະເຊີນກັບບັນຫາ ຄວາມຫຍຸ້ງຍາກໃນການຮັບສະໝັກນັກສຶກສາ.ຂໍສະແດງຄວາມຂອບໃຈເປັນຢ່າງສູງ ທີ່ມະຫາວິທະຍາໄລ ຊູໂຈ ລາວ ໄດ້ຜ່ານຜ່າອຸປະສັກ ແລະ ຄວາມຫຍຸ້ງຍາກ ນາໆປະການ,ສູ້ຊົນສືບຕໍ່ຮັບສະໝັກນັກສຶກສາ ແລະ ຈັດຕັ້ງການຮຽນ-ການສອນ, ໄດ້ຊ່ວຍສ້າງບຸກຄະລາກອນອອກຮັບໃຊ້ສັງຄົມແລະ ປະກອບສ່ວນເຂົ້າໃນ ການພັດທະນາການສຶກສາຂອງ ສປປ ລາວ ຢ່າງຕັ້ງໜ້າ.

   ທ່ານ.ສຈ ຫວງຊິ້ງ ໄດ້ກ່າວຕື່ມອີກວ່າ, ເຖິງແມ່ນວ່າ ໃນຊຸມປີໝໍ່ໆມານີມະຫາວິທະຍາໄລ ຊູໂຈ ລາວ ຈະປະເຊີນກັບບັນຫາ ແລະ ຄວາມຫຍຸ້ງຍາກຕ່າງໆນາໆ ກໍຕາມ,ແຕ່ຄວາມຕັດສິນໃຈຂອງມະຫາວິທະຍາໄລ ຊູໂຈ ຈີນ ໃນການສືບຕໍ່ກໍ່ສ້າງ ແລະ ພັດທະນາມະຫາວິທະຍາໄລຊູໂຈ ລາວ ນັ້ນ ແມ່ນບໍ່ມີວັນປ່ຽນແປງ. ມະຫາວິທະຍາໄລ ຊູໂຈ ລາວ ຈະປະຕິບັດຕາມຂໍ້ກໍານົດແລະ ກົດລະບຽບທີ່ກະຊວງສຶກສາທິການ ແລະ ກິລາລາວ ວາງອອກຢ່າງເຂັ້ມງວດ, ຈັດຕັ້ງການຮຽນ-ການສອນຢ່າງເປັນລະບົບ,ເນັ້ນໜັກເນື້ອຫາ ແລະ ຄວາມຮູ້, ຍົກສູງຄຸນນະພາບຂອງການຮຽນ-ການສອນ,ຊ່ວຍສ້າງບຸກຄະລາກອນທີ່ມີຄຸນນະພາບ ໃຫ້ແກ່ສັງຄົມລາວໃຫ້ຫຼາຍເທົ່າທີ່ຈະຫຼາຍໄດ້.

   ທ່ານ.ຮສ.ປອ ພຸດ ສິມມາລາວົງ ໄດ້ກ່າວວ່າ, ກະຊວງສຶກສາທິການ ແລະກິລາ ຈະສືບຕໍ່ໃຫ້ການສະໜັບສະໜູນ ວຽກງານການກໍ່ສ້າງ ແລະ ຈັດຕັ້ງການຮຽນ-ການສອນຂອງມະຫາວິທະຍາໄລ ຊູໂຈ ລາວ ຕໍ່ໄປຢ່າງແນ່ນອນ,ພ້ອມທັງຈະໃຫ້ການຊ່ວຍເຫຼືອທຸກຢ່າງເທົ່າທີ່ຈະຊ່ວຍໄດ້, ທ່ານໄດ້ອວຍພອນໃຫ້ມະຫາວິທະຍາໄລຊູໂຈ ລາວ ຈົ່ງໄດ້ຮັບການພັດທະນາໃຫ້ນັບມື້ເຕີບໂຕ ແລະ ເຂັ້ມແຂງ ຍິ່ງໆຂຶ້ນ.