ໃນຕອນບ່າຍຂອງວັນທີ 19 ກໍລະກົດ 2021, ງານແຂ່ງຂັນ “ຂົວພາສາຈີນ” ຂອງນັກສຶກສາມະຫາວິທະຍາໄລ ຮອບຄັດເລືອກທີ່ ສປປ ລາວ ຄັ້ງທີ20 ພາຍໄຕ້ຫົວຂໍ້ “ຄອບຄົວດຽວກັນ” ໄດ້ຈັດຂຶ້ນຢູ່ທີ່ ສະຖາບັນຂົງຈື ມະຫາວິທະຍາໄລ ແຫ່ງຊາດ.

“ຂົວພາສາຈີນ” ແມ່ນງານແຂ່ງເວົ້າພາສາຈີນລາຍການໃຫຍ່ລະດັບສາກົນທີ່ຈັດໂດຍສະຖາບັນຂົງຈື ແລະ ຮັ້ນປ້ານ, ເປັນກິດຈະກໍາໃນຂົງການແລກປ່ຽນວັດທະນະທໍາ ທີ່ມີຊື່ສຽງໂດ່ງດັງ ໄປທົ່ວໂລກແລະ ຈະຈັດໃຫ້ມີການແຂ່ງຂັນປີລະຄັ້ງ. ຈຸດປະສົງຕົ້ນຕໍຂອງການຈັດງານດັ່ງກ່າວແມ່ນເພື່ອສົ່ງເສີມຄວາມກະຕືລືລົ້ນໃນການຮຽນພາສາຈີນຂອງຊາວໜຸ່ມ ນັກຮຽນນັກສຶກສາ ໃນແຕ່ລະປະເທດ, ເພີ່ມທະວີຄວາມຮັບຮູ້ ແລະ ເຂົ້າໃຈກ່ຽວກັບພາສາ ແລະ ວັດທະນະທໍາຈີນ.ເລີ່ມແຕ່ປີ 2006ທີໄດ້ມີການຈັດການແຂ່ງຂັນ ຢ່າງປະສົບຜົນສໍາເລັດຢູ່ ສປປ ລາວ ເປັນຕົ້ນມາ, “ຂົວພາສາຈີນ”ກໍເລີ່ມນັບມື້ນັບເປັນທີ່ຮັບຮູ້ໃນສັງຄົມລາວຢ່າງກວ້າງຂວາງ, ເຊື່ອຍສ້າງໂອກາດໃນການຮຽນຮູ້ພາສາແລະ ເຂົ້າໃຈໃນວັດທະນະທໍາຈີນ ໄດ້ນັບມື້ນັບຫຼາຍຂຶ້ນ. ໃນປີນີ້ ໄດ້ມີ ນັກສຶກສາຈໍານວນ 10ຄົນ ທີ່ໄດ້ຜ່ານເຂົ້າຮອບຄັດເລືອກໃນຄັ້ງນີ້.

ການແຂ່ງຂັນຄັ້ງນີ້ ແມ່ນພາຍໄຕ້ການເປັນເຈົ້າພາບໂດຍສະຖານທູດຈີນປະຈໍາ ສປປ ລາວ ແລະ ຮັບຜິດຊອບຈັດໂດຍສະຖາບັນຂົງຈື ມະຫາວິທະຍາໄລ ແຫ່ງຊາດ,ເນື້ອໃນຂອງການແຂ່ງຂັນ ແມ່ນແບ່ງອອກເປັນ 3 ຂັ້ນຕອນຄື ການເວົ້າຕາມຫົວຂໍ້, ການຖາມຕອບແລະ ການສະແດງ.ໃນຂັ້ນຕອນການເວົ້າຕາມຫົວຂໍ້,ຜູ້ເຂົ້າແຂ່ງຂັນແຕ່ລະຄົນແມ່ນເວົ້າໄດ້ດີ, ໂດຍລວມແລ້ວເນື້ອໃນ ການເວົ້າແມ່ນກ່ຽວພັນກັບມິດຕະພາບລາວຈີນ, ການຮ່ວມຕໍ່ສູ້ກັບການແຜ່ລະບາດຂອງເຊື້ອພະຍາດ COVID-19. ໃນຂັ້ນຕອນການສະແດງແມ່ນມີການສະແດງດົນພື້ນເມືອງ, ກັງຟູຈີນ, ຮ້ອງເພງຈີນ, ຟ້ອນຊົນເຜົ່າ, ເລົ່າບົດກອນ ແລະອື່ນໆ ຢ່າງມີບັນຍາກາດຟົດຟື້ນ.ຕົວແທນຜູ້ເຂົ້າຮ່ວມການແຂ່ງຂັນຂອງ ມະຫາວິທະຍາໄລ ຊູໂຈ ລາວ ມີທ້າວ ສຸພາບ ຄໍາຜຸຍ ນັກສຶກສາ ປະລິນຍາຕີ ຮຸ່ນປີ 2018 ແລະ ທ້າວ ວິທູນ ພູທອນສີ ນັກສຶກສາປະລິນຍາຕີຮຸ່ນປີ 2019, ພາຍໄຕ້ການເອົາໃຈໃສ່ຂອງອາຈານຜູ້ຊີ້ນໍາທັງ 4 ທ່ານ,ໄດ້ຊ່ວຍໃຫ້ນ້ອງນັກສຶກສາທັງສອງ ສາມາດ ສະແດງລະດັບຄວາມສາມາດທາງດ້ານພາສາຈີນຂອງຕົນພາຍໃນງານ. ໂດຍສະເພາະ ບົດຟ້ອນຂອງ ທ້າວ ສຸພາບ ໃນບົດຟ້ອນທີ່ມີຊື່ວ່າ “ມືຊ້າຍຊີ້ດວງຈັນ”, ແມ່ນໄດ້ມີຄວາມງົດງາມ ຈົນໄດ້ຮັບລາງວັນການສະແດງດີເດັ່ນ.

ຜ່ານການແຂ່ງຂັນຢ່າງເຂັ້ມຂຸ້ນ ເປັນໄລຍະເວລາ 3 ຊົ່ວໂມງ,ຜົນຂອງການແຂ່ງຂັນແມ່ນ Miss Liwenna ຕົວແທນຈາກຄະນະອັກສອນສາດມະຫາວິທະຍາໄລແຫ່ງຊາດ ໄດ້ຮັບລາງວັນທີ 1 ແລະ ລາງວັນການເວົ້າດີເດັ່ນ, ທ້າວ ສຸພາບ ແລະທ້າວ ວິທູນ ຕົວແທນຈາກ ມະຫາວິທະຍາໄລ ຊູໂຈ ລາວ ແມ່ນໄດ້ຮັບລາງວັນທີ 3.ເຖິງວ່າການແຂ່ງຂັນຈະສິ້ນສຸດລົງແລ້ວກໍຕາມ, ແຕ່ “ຂົວພາສາຈີນ” ກໍໄດ້ກາຍເປັນຂົວມິດຕະພາບໃນການແລກປ່ຽນວັດທະນະທໍາຂອງຊາວໜຸ່ມຈາກທັງສອງປະເທດ ລາວ-ຈີນ.