〇ແນວຄວາມຄິດໃນການສ້າງຕັ້ງ

ມະຫາວິທະຍາໄລ ຊູໂຈ ລາວ ແມ່ນຖືເອົາມາດຕະຖານ ແລະ ຮູບແບບການຮຽນການສອນຂອງສະຖາບັນການສຶກສາຊັ້ນສູງຂອງຈີນເປັນບ່ອນອີງໃນການສ້າງຕັ້ງ, ຍຶດໝັ້ນການກໍ່ສ້າງແບບ ”ຈຸດເລີ່ມຕົ້ນສູງ, ມາດຕະຖານສູງ ແລະ ຄຸນນະພາບສູງ”, ກໍ່ສ້າງບຸກຄະລາກອນທີ່ມີຄຸນນະພາບ ແລະ ແທດເໝາະກັບຄວາມຮຽກຮ້ອງຕ້ອງການໃນການພັດທະນາເສດຖະກິດ ແລະ ສັງຄົມຂອງລາວ, ພັັດທະນາໃຫ້ກາຍເປັນມະຫາວິທະຍາໄລແບບລວມສູນ ທີ່ຈັດຢູ່ໃນແຖວໜ້າຂອງລາວ ກໍຄືບັນດາປະເທດອາຊຽນ.

〇 ແຜນການກໍ່ສ້າງວິທະຍາເຂດ

ພື້ນທີ່ດິນສໍາລັບກໍ່ສ້າງວິທະຍາເຂດມະຫາວິທະຍາໄລ ຊູໂຈ ລາວ ແມ່ນມີເນື້ອທີ່ທັງໝົດ 22 ເຮັກຕາ, ໂດຍຈະໄດ້ດໍາເນີນການກໍ່ສ້າງໄປເປັນແຕ່ລະໄລຍະ. ໄລຍະທີ 1 ແມ່ນຈະສ້າງໃຫ້ສາມາດຮອງຮັບນັກສຶກສາໄດ້ທັງໝົດປະມານ 600 ຄົນ, ເນື້ອທີ່ສິ່ງປຸກສ້າງແມ່ນປະມານ 6000 ຕາແມັດ.

〇 ການກໍ່ສ້າງຫຼັກສູດ

ມະຫາວິທະຍາໄລ ຊູໂຈ ລາວ ຈະພັດທະນາ ແລະ ສ້າງຕັ້ງຫຼັກສູດໃໝ່ເພີ່ມຕື່ມ ຕາມຄວາມຮຽກຮ້ອງຕ້ອງການຕົວຈິງຂອງການພັດທະນາເສດຖະກິດ ແລະ ສັງຄົມຂອງລາວ. ປະຈຸບັນນີ້ແມ່ນມີແລ້ວ 4 ຫຼັກສູດ, ໃນອານາຄົດຕໍ່ໜ້າ ແມ່ນຈະກໍ່ສ້າງຫຼັກສູດສາຂາ ເສດຖະສາດ, ບໍລິຫານ, ກົດໝາຍ, ທ່ອງທ່ຽວ, ກົນຈັກ, ການຄົມມະນາຄົມຕາມລາງ, ເອເລກໂຕນິກເພື່ອການສື່ສານ, ແພດສາດ ເຫຼົ່ານີ້ເປັນຕົ້ນ.

〇 ລະດັບການສິດສອນ

ໃນໄລຍະຕົ້ນຂອງການສ້າງຕັ້ງມະຫາວິທະຍາໄລ ຊູໂຈ ລາວ ແມ່ນຈະເປີດສອນໃນລະດັບປະລິນຍາຕີ ເປັນຫຼັກ ແລະ ເປີດສອນຫຼັກສູດບໍາລຸງພາສາຈີນໄລຍະສັ້ນໄປຄວບຄູ່ກັນ. ໃນອານາຄົດ ແມ່ນຈະພັດທະນາ ແລະ ເປີດສອນໃນລະດັບປະລິນຍາໂທ ແລະ ປະລິນຍາເອກ, ພ້ອມທັງສູ້ຊົນພັດທະນາການສຶກສາໃນຂະແໜງອາຊີວະສຶກສາ ແລະ ການຝຶກອົບຮົມວິຊາຊີບ.

〇 ແຫຼ່ງທີ່ມາ ແລະ ຈໍານວນນັກສຶກສາ

ໃນໄລຍະຕົ້ນຂອງການສ້າງຕັ້ງມະຫາວິທະຍາໄລ ຊູໂຈ ລາວ ແມ່ນຈະເປີດຮັບນັກສຶກສາລາວ ເປັນຫຼັກ. ພາຍຫຼັງມະຫາວິທະຍາໄລຫາກໄດ້ຮັບການພັດທະນາໄປໄດ້ໃນລະດັບໃດໜຶ່ງແລ້ວ ແມ່ນຈະເປີດຮັບນັກສຶກສາຈາກບັນດາປະເທດອອ້ມຂ້າງ ກໍຄືນັກສຶກສາຈາກບັນດາປະເທດອາຊຽນ. ມະຫາວິທະຍາໄລ ຊູໂຈ ລາວ ຍັງຈະສ້າງເງື່ອນໃຂໃຫ້ເປັນບ່ອນຮຽນສໍາລັບລູກຫຼານຂອງນັກທຸລະກິດຈີນໃນລາວ ແລະ ລູກຫຼານຂອງຄົນຈີນຕ່າງດ້າວຢູ່ລາວນໍາອີກ.

ຫວັງວ່າໃນໄລຍະເວລາ 10 ຫາ 15 ປີ ຈະມີນັກສຶກສາທີ່ພວມສຶກສາຢູ່ຈໍານວນ 1000 ຄົນ, ເປົ້າໝາຍ ສູງສຸດແມ່ນສູ້ຊົນໃຫ້ໄດ້ມີນັກສຶກສາທັງໝົດ 5000 ຄົນ.

〇 ທີມງານຄູອາຈານ

ໃນໄລຍະຕົ້ນຂອງການສ້າງຕັ້ງມະຫາວິທະຍາໄລ ຊູໂຈ ລາວ, ອາຈານສອນພາສາຈີນ ແລະ ວິຊາສະເພາະແມ່ນມະຫາວິທະຍາໄລ ຊູໂຈ ຈີນ ເປັນຜູ້ສະໜອງໃຫ້, ສໍາລັບອາຈານສອນໝວດວິຊາພື້ນຖານ ແມ່ນເຊື້ອເຊີນອາຈານຈາກ ມະຫາວິທະຍາໄລແຫ່ງຊາດລາວ ແລະ ສະຖາບັນການສຶກສາຊັ້ນສູງຂອງລາວ ມາຊ່ວຍສິດສອນ. ໃນອານາຄົດ, ແມ່ນຈະນໍາໃຊ້ຮູບແບບຮັບສະໝັກອາຈານລາວທີ່ຮຽນຈົບຈາກ ສປ ຈີນ ຜູ້ທີ່ດີເດັ່ນ ຫຼື ຄັດເລືອກບຸກຄະລາກອນພາຍໃນລາວຜູ້ທີ່ດີເດັ່ນ ເພື່ອໄປຍົກລະດັບວິຊາສະເພາະ ແລະ ວຸດທິການສຶກສາຢູ່ຕ່າງປະເທດ, ຄ່ອຍໆເພີ່ມຈໍານວນຄູອາຈານທີ່ເປັນຄົນລາວໃຫ້ນັບມື້ນັບຫຼາຍຂຶ້ນ, ພ້ອມ ດຽວກັນນັ້ນ ກໍຍັງຈະເປີດຮັບສະໝັກຄູອາຈານຕ່າງປະເທດຈາກທົ່ວທຸກມຸມໂລກ, ທ້າຍສຸດແມ່ນໃຫ້ໄດ້ ຕາມຈຸດປະສົງທີ່ຈະມີທີມງານຄູອາຈານທີ່ມີລັກສະນະທ້ອງຖິ່ນ ແລະ ສາກົນ ປະສົມປະສານກັນ.

◎ ທ່າແຮງໃນການພັດທະນາ

ໃນປີ 2013, ພະນະທ່ານ ສີຈິ້ນຜິງ ປະທານປະເທດຈີນ ໄດ້ສະເໜີນະໂຍບາຍ“ໜຶ່ງແລວ ໜຶ່ງເສັ້ນທາງ”ທີ່ເປັນນະໂຍບາຍຍຸດທະສາດແລະມີຄວາມໝາຍຄວາມສໍາຄັນເປັນຢ່າງສູງ. ສປປ ລາວ ເປັນໜຶ່ງໃນປະເທດທີ່ນອນຢູ່ໃນແລວນະໂຍບາຍ“ໜຶ່ງແລວ ໜຶ່ງເສັ້ນທາງ”ດັ່ງກ່າວ, ສອງຊາດລາວຈີນເປັນປະເທດເພື່ອນມິດທີ່ມີຊາຍແດນຕິດຈອດກັນທັງສາຍພູ ແລະ ແມ່ນໍ້າ ແລະ ມີວິໄສທັດໃນການພັດທະນາປະເທດຊາດທີ່ຄ້າຍຄືກັນ. ປະຈຸບັນນີ້, ຄວາມສໍາພັນຂອງສອງຊາດລາວຈີນ ແມ່ນໄດ້ກ້າວເຂົ້າສູ່ໄລຍະໃໝ່ຂອງການຮ່ວມສ້າງຊາຕາກໍາດຽວກັນ. ດັ່ງນັ້ນ, ຍຸດທະສາດ“ໜຶ່ງແລວ ໜຶ່ງເສັ້ນທາງ”ຈະກາຍເປັນກາລະໂອກາດໃໝ່ ທີ່ຈະມີຜົນດີທີ່ສຸດຕໍ່ການສ້າງສາ ແລະ ພັດທະນາມະຫາວິທະຍາໄລ ຊູໂຈ ລາວ. ພ້ອມດຽວກັນນັ້ນ, ມະຫາວິທະຍາໄລ ຊູໂຈ ລາວ ກໍຈະກາຍເປັນອົງກອນໜຶ່ງທີ່ມີຄວາມສໍາຄັນໃນການປະກອບສ່ວນສົ່ງເສີມ ແລະ ພັດທະນາສາຍສໍາພັນ ລາວ-ຈີນ ໃຫ້ນັບມື້ນັບໜ້ນແຟ້ນຍິ່ງໆຂຶ້ນ.

ມະຫາວິທະຍາໄລ ຊູໂຈ ຈີນ ເປັນມະຫາວິທະຍາໄລ ໃນກຸ່ມທໍາອິດທີ່ຖືກຈັດເຂົ້າຢູ່ໃນ“ໂຄງການ 211”ແລະ “ແຜນງານ 2011”ຂອງລັດຖະບານຈີນ, ເປັນສະຖາບັນການສຶກສາຊັ້ນສູງທີ່ເປັນການຮ່ວມ ສ້າງລະຫວ່າງກະຊວງສຶກສາທິການຈີນ ແລະ ອົງການປົກຄອງແຂວງຈຽງຊູ ເພື່ອໃຫ້ກາຍເປັນມະຫາວິທະ ຍາໄລທີ່ມີຄວາມ“ເປັນເລີດທັງ 2 ດ້ານ”, ເປັນສະຖາບັນການສຶກສາຊັ້ນສູງທີ່ເປັນການຮ່ວມສ້າງລະຫວ່າງກົມ ວິທະຍາສາດອຸດສາຫະກໍາປ້ອງການຊາດ ແລະ ອົງການປົກຄອງແຂວງຈຽງຊູ, ເປັນມະຫາວິທະຍາໄລ ລວມສູນ ທີ່ຂຶ້ນກັບແຂວງຈຽງຊູ. ມະຫາວິທະຍາໄລ ຊູໂຈ ລາວ ຈະນໍາໃຊ້ທ່າແຮງທີ່ມີຂອງມະຫາວິທະຍາ ໄລ ຊູໂຈ ຈີນ ຢ່າງເຕັມທີ່, ຈັດຕັ້ງການຮຽນ-ການສອນທີ່ມີວິໄສທັດຄວາມເປັນສາກົນ, ຖືເອົາຄວາມຮຽກ ຮ້ອງຕ້ອງການໃນການພັດທະນາເສດຖະກິດ ແລະ ສັງຄົມຂອງລາວ ເປັນບ່ອນອີງໃນການພັດທະນາສະຖາບັນຂອງຕົນໃຫ້ນັບມື້ນັບດີຂຶ້ນ, ພັດທະນາໃຫ້ມີສີສັນ ແລະ ເອກະລັກສະເພາະຕົນ, ສ້າງໃຫ້ມະຫາວິທະຍາ ໄລ ຊູໂຈ ລາວ ໄດ້ມີຊື່ສຽງໂດ່ງດັງ ແລະ ເປັນທີ່ຍອມຮັບຈາກຜູ້ຄົນພາຍໃນລາວ ກໍຄືໃນບັນດາປະເທດອາຊີຕາເວັນອອກສ່ຽງໄຕ້.